Anëtarja e Asamblesë Kombëtare të PS, Franka Toplana ka akuzuar kryebashkiakun e Fushë Arrëzit për falsifikim dokumentesh. Kjo akuzë vjen pasi Fran Tuci i ka nisur një shkresë kreut të Arsimit në Pukë, Nikolin Prenga, ku kërkon shkarkimin e drejtorit të Qendrës Kulturore të Fëmijëve në Fushë Arrëz, Mark Toplana, i cili është dhe bashkëshorti i Toplanës.
Kjo ka sjellë shpërthimin e Franka Toplana, e cila njihet dhe si strategia e fushatave të Partisë Socialiste. Me anë të një postimi në Facebook, Toplana hedh akuza të forta ndaj kryebashkiakut socialist në qytetin verior, ndërsa kërcënon se ashtu “siç e ndihmoi të ngjiste shkallët, ashtu do kujdeset për t’i zbritur ato”.
“Unë jam ajo Franka që gjithmonë kam thënë fjalë të mira për ty! Unë jam ajo që të dhashë dorën të ngjitje shkallët e bashkisë! Edhe tani, po të them “Të lumtë dora” se do të të shtyj të shkosh aty ku e meriton!”, shkruan ndër të tjera Franka Toplana një ndër shtyllat e Partisë Socialiste në Fushë Arrëz.
“Atij i duhet me patjetër ulja nga detyra e drejtorit të QKF, sepse duhet me patjetër të marrë shpërblimin për këtë! Dhe, strategjia me të cilën mendon të realizoje shkarkimin është kjo: Me dorën e vetë dhe me vullnetin e lire, falsifikon listë-prezencën e QKF Fushë Arrëz, dhe pikërisht këtë falsifikim zyrtar e përdor si motiv për ulje nga detyra të drejtorit. Mirëpo dita që ka falsifikuar kryetari me dorën e tij, rezulton të jetë ditë pune intensive dhe e protokolluar ne librin e mbledhjeve të QKF Fushë Arrëz në prezencën e të gjithë kolektivit”, shkruan në reagimin e saj Franka Toplana.
E kontaktuar nga BalkanWeb, Toplana shprehet se pikërisht për këtë falsifikim ajo do t’i drejtohet dhe organeve të Prokurorisë, ku do të bëjë dhe denoncimin përkatës ndaj kreut të bashkisë.
