Sot është dita e së vërtetës për skuadrat shqiptare që luajnë në Conference League, kompeticionin më të ri për klubet e Europës. Takimet e kthimit do të tregojnë se sa i vlen lëkuara secilit, Partizanit, Vllaznisë , Laçit nga Superliga, Llapit dhe Dritës nga kampionati i Kosovës, Deçiçit të Tuzit nga kampionati malazez dhe Shkupit e Strugës nga kampionati fqinj maqedon. Ndeshjet e para prodhuan kryesisht rezultate negative për shqiptarët me vetëm një fitore Europiane, Partizani që mundi moldavët e Gheorges, 5-2 në Shqipëri. Sot, priten të paktën 3 kualifikime, Partizani që ka fituar të parën 5-2, dhe ka përballë një skuadër modeste, si dhe dy skuadra të tjera (me shumjë mundësi Shkupi dhe Drita) që do të dalin nga ndeshje ku përballë janë ekipe shqiptare kundër njëri-tjetrit.
Vllaznia
Shkodranët presin bosnjakët e Shiroki Brijeg në orën 21:00, pasi kanë humbur 3-1 të parën. Vllaznia është skuadra më e indinjuar e ndeshjeve të para, pas masakrës në gjykim nga arbitri në ndeshjen e parë. Në Shkodër mezi po e presin ndeshjen e kthimit për të shfryrë mllefin dhe raportohet se biletat janë shitur që në ditët e para në numër të konsiderueshëm. Goli në minutat e fundit bëri që në Shkodër të ketë shpresë për kualifikim pasi një gol i shpejtë e hap sfidën. Shiroki Brijeg gjithsesi është një skuadër jo e lehtë për t;u mundur sepse dhe në ndeshjen e parë shfaqën përgatitje të mirë atletike. Nëse kalojnë, shkodranët përballen me qipriotët e Ael Limasol.
Partizani
Të kuqtë e kryeqytetit kanë fituar javën e kaluar me rezultatin 5-2 dhe në Moldavi shkojnë për të marrë kualifikimin pa shumë lodhje apo kartona sepse turi tjetër vjen shumë shpejt dhe përballë do të kenë Bazelin. Duket e pamundur të përmbyset 5-2 i ndeshjes së parë dhe Daja mund të mendojë dhe për të freskuar ekipin me ndonjë rotacion të lehtë. Ndeshja Sfintul Gheorghe – Partizani do të transmetohet në faqen e internetit të klubit moldav pa pagesë.
Laçi
Në orën 20:00 nis misioni kurbinas. Bardhezinjtë e drejtuar nga Shpëtim Duro do të duhet të kthejnë në favor të vet disavantazhin 0-1 që morën në ndeshjen e parë në Podgoricë. Skuadra laçiane do të duhet të fitojë me patjetër ndërkohë që malazezët kanë dhe barazimin në favor. Mbetet për t;u parë se si do të reagojë skuadra pasi në minutën e fundit të ndeshjes së parë humbën dhe një 11-metërsh me Mazrekajn çka do të thotë se rezultati 1-0 i ndeshjes së javës së kaluar nuk përfaqëson forcën e vërtetë të skuadrave. Nëse veriorët kalojnë turin, ndeshen me ekipin universitar të Krajovës në Rumani.
Ndeshjet e tjera të skuadrave shqiptare:
17:00 Struga –Liepaja (1-1)
20:00 Llapi-Shkupi (0-2)
20:45 Deçiç-Drita (1-2) /TIRANA TODAY
