Furgoni që bënte shoqërimin e tyre drejt pikave të punës nisej nga Kamza në orën 5 të mëngjesit. Shoferi i fugonit i pyeste nëse ishin për punë dhe gratë hipnin në automjet. Ata shkonin në Shkodër dhe aty furgoni i linte dhe tregonte se do të vinte dikush tjetër që ti merrte.
Një pjesë e grave nuk njiheshin me njëra-tjetrën, por qëllimi i transportit të tyre ishte i përbashkët, nevoja ekonomike për të mbajtur familjen. Pagesat për punën, varionin nga 2 mijë deri në 5 mijë lekë në ditë.
Janë pyetur shtetaset që janë gjetur në banesën e Zef Gjonit dhe në deklarimet e tyre sqarojnë se nuk kanë lidhje me ato çfarë dyshohen, por kanë shkuar për të punuar në sherebelë, pasi kanë nevoja ekonomike dhe se nuk njohin asnjë person, apo organizator, por kanë dëgjuar se në fshatrat ku jetojnë se kërkonin punëtorë në Shkodër për sherebelë.
Procedimi i rastit të fshatit Bardhaj, në fakt është bashkuar me një tjetër rast në qytetin e Shkodrës. Një operacion i rëndësishëm i policisë së këtij qyteti në fshatin Vallas, në Oblikë. Në një distancë 100 metra nga xhamia, uniformat blu konstatuan parcela të mbjella me rreth 32 mijë rrënjë kanabis sativa.
Gjatë kontrollit të ambienteve të përshtatura për kultivimin e kësaj bime është konstatuar një sasi totale prej 246 kilogramësh e gatshme për treg. Lidhur me këtë operacion, u vunë nën akuzë të paktën 16 persona.
Më specifik është rasti i familjes Dahati. Besimi së bashku me dy djemtë e tij, Izmirin dhe Sametin, u identifikuan si kultivuesit kryesorë të parcelave me rreth 32 mijë bimë.
Policia më pas i është drejtuar banesës së fundit të fshatit, që është e kryeplakut Xhevahir Tahiri, një banesë e braktisur prej vitesh. Atje kanë vënë re një hapësirë të përshatur për tharjen e kanabisit. Në njërën nga dhomat e shtëpisë ishin shtuar dyshekë dhe gjendeshin rroba apo çanta të ndryshme, kryesisht gjëra të nevojshme për gra. Në dosje sëarohen edhe momentet se si njëri prej perosnave të implikuar ua hodhi punonjësve të policisë dhe arriti të largohet.
‘Në një moment shtetasi Arian Popa ka deklaruar se ka dhe kushëririn e tij në mal dhe i ka kërkuar telefonin policisë për ta telefonuar. Në momentin që i është dhënë telefoni ka vrapuar menjëherë në drejtim të pyllit, pavarësisht ndjekjes duke përfituar nga bimësia e denduar ka arritur të largohet’
Deklaratat e të arrestuarit në flagrancë Ardjan Tahiri kanë zbuluar dhe organizimin e punës. Sipas tij, Admir Selgjekaj ishte personi kryesor që kishte sponsorizuar dhe drejtonte punën e parcelave të kanabisit i ndihmuar nga Arian Popa. Ky i fundit merrej me furnizimet dhe rekrutimet e punëtorëve. Një tjetër dëshmi e fortë e Ardjan Tahirit lidhej dhe me gratë e hashashit që punonin në parcelat e tyre në fshatin Vallas. Sipas tij, aty kanë qenë rreth 70-80 gra që punonin me krasitjen e bimës, për të nxjerrë boçet nga kërcelli dhe për ti lënë të thahen. Ai ka pranuar se nuk e di se kush kanë qenë gratë që janë rekrutuar.
Policia nga kqyrja e vendit ka arritur në përfundimin se deklarimit e Tahirit mund të ishin të sakta, pasi në ambientet e përshtatura mund të ishin rreth 70 ambiente të përshtatura për vende fjetjeje. Tahiri ka deklaruar se personi që rekrutonte gratë është pikërisht e intervistuara jonë./ Top Channel
