Skënderbeu firmos me yllin e Luftëtarit

Luftëtari ka në përbërje dy lojtarë që janë mjaft të kërkuar në këtë afat kalimtarë, Abazajn dhe Bregun. Për të dy këta lojtarë ka interesin më të madh nga Superioria e ka treguar Skënderbeu, i cili së fundmi ka arritur të nënshkruaj edhe me Kristal Abazajn. Transferimi i tij te kuqebardhët e drejtuar nga trajneri Ilir Daja është arritur si marrëveshje mes dy klubeve dhe vetë lojtarit, por do të bëhet fakt i kryer në verë, pasi të mbarojë edicioni aktual i futbollit në Shqipëri. Një gjë të tillë e ka konfirmuar vetë sulmuesi 21-vjeçar i Luftëtarit dhe Shqipëria U-21.

Marrëveshja në fjalë e lidh futbollistin me ekipin korçar deri në vitin 2020. Formula e zgjedhur nga kryesuesit e Superiores është e tillë: Abazaj do të vijojë të luajë me skuadrën gjirokastrite në 6 muajt e ardhshëm, në formë huazimi, ndërsa verën e ardhshme do t’i bashkohet Skënderbeut. Paga e tij, nga tani e në vazhdim, do të mbulohet nga juglindorët e presidentit Ardian Takaj. Sidoqoftë, në rast të ndonjë oferte të mirë nga jashtë, Abazaj mund edhe të shitet këtë janar, por tashmë nga Skënderbeu, që ka kartonin e plotë të futbollistit.