Jozefina Topalli, duke folur në emër të demokratëve, thotë se tashmë kanë humbur besimin. Kjo lidhet drejtëpërdrejtë me marrëveshjen me Ramën, ku sipas saj, Basha shiti PD për disa drejtori me lekë, dhe për 14 milionë eurot që i dha kryeministri më pas.
Po kështu ajo lëshon një lum me akuza, ku me Bashën në krye, qytetarët ndihen të tradhtuar nga pazaret e ulëta që vazhdojnë. Në një intervistë dhënë për “Panorama”, ajo kthehet pas në kujtesë, duke cituar se demokratët u tradhtuan me çadrën, me Babalen, me Teatrin.
Ajo pretendon se shtatori do ishte muaji i mbushjes së shesheve si në Rumani, por Lulzim Basha takohet me grupin e tij të vogël të deputetëve në hotele luksoze të vendit. Topalli ka zbuluar edhe detaje të tjera për të cilat thotë se Basha flet kundra Ramës në televizione, por ndërkohë të huajt tregojnë se Rama flet më shpesh në telefon me Bashën, se me Fugën e tij.
Ju personalisht, por edhe një grup tjetër ish-deputetësh dhe kontribuesish në PD keni ngritur pretendime në lidhje me drejtimin e PD-së nga Lulzim Basha. Si e vlerësoni gjendjen në PD në mandatin e dytë të Bashës, si kryetari i saj?
“Çështja e humbjes së besimit ndaj Lulzim Bashës është shumë më e gjerë. Rreth 250 mijë votues, me votën e tyre të munguar shprehën mosbesimin ndaj Lulzim Bashës. Ata besuan se Lulzim Basha në marrëveshjen me Edi Ramën, shiti PD për disa drejtori me lekë, dhe për 14 milionë eurot që i dha kryeministri më pas. Ata besojnë në fakt, se kjo është vetëm maja e ajsbergut.
Ata ndihen të tradhtuar nga pazaret e ulëta që vazhdojnë. Atyre iu premtua çdo vit se me protesta do rrëzonin qeverinë, por protestat nuk ndodhnin se “papritmas” vinin pushimet për Krishtlindje, pastaj festat e Pashkëve, pastaj vakancat e verës.
Atyre iu premtua se do fillonin mosbindjen civile, por as kjo nuk u bë, bile as nuk filloi ndonjëherë. Iu premtua se do kalonin mbi trupin e Bashës e ministri i Brendshëm nuk do guxonte të hynte në zyrë. Demokratët u tradhtuan me çadrën, me Babalen, që për çudi nuk ndihet më, me Teatrin, për të cilin mezi cicërojnë më.
Shtatori do ishte muaji i mbushjes së shesheve si në Rumani, por Lulzim Basha takohet vetëm ndër vedi, me grupin e tij të vogël të deputetëve në hotele luksoze të vendit. Në krah të tij ndihet ngrohtë me njerëz të përfolur pa fund për korrupsion (me ndonjë përjashtim të vogël). Nuk shkon në Parlament, por as nuk djeg mandatet. Flet kundra Ramës në TV, por ndërkohë të huajt tregojnë se Rama flet me shpesh në telefon me Bashën, se me Fugën e tij”.
https://tiranatoday.com/ska-me-heshtje-topalli-flet-me-ne-fund-per-partine-e-re/
