Ndërtohet skema e aksidentit të rëndë që i mori jetën taksistit 60-vjeçar dhe pasagjeres së tij 23-vjeçare. Prokuroria e Durrësit ka ndërtuar skemën, ndërsa nga të dhënat e grupit hetimor rezulton se të dyja mjetet kanë qenë me shpejtësi të madhe. Megjithatë shkaktar i aksidentit është mjeti tip Benz me targa AA 060 SP, i cili ka qenë me shpejtësi të madhe, mbi 200 km/orë.
Nga hetimet rezulton se dy automjetet kanë pasur një distancë prej 600-800 metrash me njëri-tjetrin, por shpejtësi e madhe e Benzit luksoz ka bërë që ata të përplasen fuqishëm para karburantit.
Nga përplasja e fuqishme, Benzi ka ‘fluturuar’ mbi 100 metra në ajër, ndërsa është ngritur në lartësinë prej 3 metra, duke përfunduar përmbys i copëtuar në krahun tjetër të karburantit.
Ndërkohë, mister është edhe arsyeja e kthimit të pasagjeres Avdillari, të cilës iu gjet një biletë e prerë për në Itali, por ajo ka marrë një taksi për t’u kthyer në Tiranë, udhëtim që u ndërpre tragjikisht.
Shoferi i Benzit është larguar menjëherë nga vendngjarja, ndërsa policia ka bërë sot identifikimin e tij, që rezulton të jetë shtetasi Fatjon Zhaporja, pronar i mjetit me targë AA 060 SP. Po ashtu, policia nuk përjashton as pistën e ‘vrasjes’, ndërsa po heton për të zbuluar nëse ka pasur njohje mes shoferit të Benzit dhe viktimës Elena Avdillari.
