Një ngjarje e rëndë ka ndodhur në Kaliforni, ku janë zbuluar 13 fëmijë, të cilët mbaheshin të prangosur me zinxhirë në shtretërit e tyre.
Në pranga kanë rënë dy prindërit e fëmijëve, David Allen Turpin, 57 vjeç dhe Lousie AnnaTurpin, 49 vjeç, të cilët akuzohen për torturë dhe rrezikim të jetës së fëmijëve.
Fëmijët e çiftit, nga mosha 2 deri në 29, jetonin në Perris, në juglindje të Los Anxhelosit, shkruan BBC.
Policia u njoftua nga një prej viktimave, një vajzë 17-vjeçare, e cila arriti të shpëtojë, ndërsa telefonoi numrin e urgjencës. Vajza, e cila dukej si një 10-vjeçare, përdori një telefon celular që gjendej brenda shtëpisë, për të zbuluar më pas tmerrin që kishin përjetuar nga prindërit monstër.
Çfarë gjeti policia në shtëpi?
Pas telefonatës, oficerët e policisë gjetën fëmijët të lidhur në shtretërit e tyre me zinxhirë dhe dry në një mjedis të errët dhe me erë të keqe.
Sipas policisë, prindërit nuk ishin në gjendje të jepnin menjëherë një arsye logjike pse fëmijët e tyre ishin të mbajtur në atë mënyrë, raporton Tirana Today.
Zyrtarët u tronditën kur zbuluan se shtatë prej fëmijëve që mbaheshin në shtëpi ishin në të vërtetë në moshën 18 deri në 29 vjeç.
“Viktimat duket se ishin të kequshqyer dhe shumë të pistë”, tha policia. Të gjitha viktimat tani po trajtohen në spitalet lokale.
Kreu i njërit prej spitaleve, Mark Uffer, tha për agjencinë e lajmeve Reuters: “Është në të vërtetë zemërthyese për stafin dhe është e pabesueshme ajo që shohim”.
Çfarë dimë për familjen?
Sipas të dhënave publike, çifti ka jetuar në Teksas për shumë vite përpara se të shkojë në Kaliforni.
Zoti Turpin thuhet se ka pasur një punë relativisht të paguar si inxhinier në kompaninë e teknologjisë së aviacionit dhe teknologjisë së mbrojtjes Northrop Grumman. Megjithatë, me kaq shumë fëmijë dhe gruan e tij që nuk punojnë, të dhënat tregojnë se shpenzimet e tij tejkalojnë të ardhurat e tij. Ai është shpallur i falimentuar dy herë.
Në faqen e internetit të Departamentit të Arsimit të Kalifornisë, Turpin është renditur si drejtor i shkollës së Sandcastle – një shkollë private që vepronte jashtë shtëpisë së tij, raporton Tirana Today.
Shkolla u hap në mars 2011, thotë faqja e internetit. Këtu janë regjistruar gjashtë nxënës, të gjithë në klasa të ndryshme.
Prindërit e Turpin thanë se nipërit e mbesat e tyre ishin të shkolluar në shtëpi, por nuk e kishin parë familjen për katër apo pesë vjet.
Çfarë thonë fqinjët?
Njëri nga fqinjët i tha Reuters se familja Turpin ishte ajo lloj familje për të cilën nuk dijë thuajse asgjë.
“Nuk do i shihje kurrë të shkonin për vizita dhe nuk kemi parë kurrë dikë t’u vinte për vizitë. Gjithçka që kemi parë është se ata dilnin sa për të bërë pazar”, shtoi fqinji.
Një tjetër fqinje, Kimberly Milligan, 50 vjeçe, tha se çifti dukej shumë i çuditshëm dhe ata shpesh pyesnin veten pse fëmijët nuk dilnin kurrë për të luajtur.
“Mendova se fëmijët po shkolloheshin në shtëpi. Ti e di kur ka diçka që nuk shkon, por ndonjëherë thjesht nuk do të mendosh keq për njerëzit”, tha ajo.
Madje, fqinja përmend një rast duke përshëndetur fëmijët, por tha se ata e kishin parë gruan “si fëmijë që dëshironin ta bënin veten të padukshëm”. TIRANA TODAY
