Një tjetër sasi djathi me përmbajtje niseshteje është bllokuar nga AKU, e po kështu është zbuluar edhe furnizuesi. Autoriteti Kombëtar i Ushqimit (AKU), ka bllokuar në tregun Agro-Ushqimor në Tiranë, rreth 180 kg produkt djathi, i cili në përbërje të tij kishte niseshte.
“Sipas AKU, nga inspektimet u konstatua që subjekti me Nipt L52026101D, ishte furnizuar sipas një fature të thjeshtë tatimore Nr. 2 datë 15.7.2018, nga subjekti Alfred Hila në Shkodër me Nipt K46823021D. Nisur nga ky kontroll, DRAKU Shkodër nisi menjëherë inspektimin në subjektin e lartpërmendur, nga ku konstatoi që subjekti me Nipt K46823021D, kryente veprimtari në kundërshtim me ligjin, pasi nuk zotëronte asnjë dokumentacion shpjegues për gjurmueshmërinë e produkteve.
Sipas ligjit në fuqi, çdo subjekt ka detyrim ligjor për të patur të dhëna të plota e dokumentuara për lëndën e parë të furnizuar dhe për çdo furnizim për të tretë, me produktin përfundimtar të kryer.
Menjëherë nga trupa e inspektorëve të AKU Shkodër, u mor masë administrative ndaj këtij subjekti, si dhe u vendos masa e bllokimit të produktit djathë të falsifikuar, i cili sipas procedurës do të asgjësohet.
AKU gjykon që është e dukshme kryerja e veprës penale të mashtrimit, parashikuar nga neni 143 i Kodit Penal, dhe këtë rast do e depozitojë me shkresë në Prokurori, në kuadër të bashkëpunimit operacional”, thuhet në reagimin për media.
Konsumatori shqiptar vazhdon të mashtrohet çdo ditë nga tregtarët, të cilët shesin djathë. Si rregull, prodhuesi dhe tregtari i djathit duhet të deklarojnë origjinën dhe elementët përbërës të produktit ushqimor.
Por një gjë e tillë nuk respektohet. Për rrjedhojë, konsumatori asnjëherë nuk e di se çfarë ka në tryezë.
Po pse veprohet në këtë formë? Prodhuesit e djathit, duke zëvendësuar qumështin me niseshte, ulin koston dhe rrisin fitimin.
