Federata Shqiptare e Peshëngritjes pas skandalit të dopingut edhe në botërorin e Amerikës, duket se do të ketë një revolucion të thellë. Pas kërkesave të shumta që kishin adresuar klubet në Komitetin Drejtues të këtij institucioni, për përjashtimin e këtyre të fundit dhe zëvendësimin e anëtarëve të rinj, si dhe president të ri u vendos që më 5 prill të mblidhet Asambleja e jashtëzakonshme.
Sekretari i përgjithshëm i FSHP-së, Agron Haxhihyseni konfirmoi vetëm mbajtjen e Asamblesë.
“Komiteti Drejtues i FSHP-së, në mbledhjen urgjente të zhvilluar shqyrtoi kërkesën e bërë nga disa klube. Ai vendosi në mënyrë unanime mbajtjen e Asamblesë së Përgjithshme të Jashtëzakonshme më 5 prill, ndërkohë që dy kërkesat e tjera nuk pranohen, se bien ndesh me Statutin e Federatës”, tha Agron Haxhihyseni.
Asambleja e Jashtëzakonshme e FSHP-së mbahet pas dorëheqjes së presidentit Elez Gjoza, pas rezultateve pozitive në testet antidoping të Romela Begajt në Botërorin e Shteteve të Bashkuara. Ndërkohë, FSHP-ja vendosi edhe shtyrjen e Kupës së Shqipërisë, e parashikuar për më 16 shkurt, pasi ende nuk është përcaktuar data e Kampionatit Europian të Peshëngritjes.
