Mos veprimi dhe qëndrimi në heshtje i Shoqatës së Trajnerëve në Shqipëri, pas ngjarjes në Shkodër ku u tentua të goditej me thikë trajneri i Vllaznisë, Ernest Gjoka, tregon edhe një herë se ekzistenca e saj është thjesht një domosdoshmëri për të dalë në skenë në kohë zgjedhjesh. Me pak fjalë, një vegël për vota.
Nëse kishte një rast kur kjo e ashtuquajtur shoqatë duhet të ngrinte zërin ose minimumi të bënte një deklaratë për shtyp, qoftë edhe duke e vendosur në faqen zyrtare të FSHF-së (kështu ka vepruar rëndom Shoqata e Arbitrave), ishte pikërisht sulmi me thikë që iu bë trajnerit të Vllaznisë, Ernest Gjoka.
Edhe pse jemi në vitin 2018, askush nuk di të thotë se kush është kryetari i kësaj shoqate. Në fakt, dy dekada më parë ka qenë Bejkush Birçe, ai i cili është përpjekur të mbledhë trajnerët elitarë, por natyrshëm, shoqata nuk ka funksionuar për të mbrojtur të drejtat e trajnerëve. E vetmja gjë që dihet është fakti se në emër të saj votoi në zgjedhjet e fundit të FSHF-së, Vladimir Ajazi, i cili pak kohë më parë ka qenë trajner i portierëve të Kombëtares.
