Instituti i Gjeoshkencave, Energjisë, Ujit dhe Mjedisit jep lajme të mira. Nuk ka më rrezik për përmbytje të tjera. Meqenëse Lumi Vjosa pritet të ulë ndjeshëm prurjet përgjatë ditës së nesërme janë hequr paralajmërimet për vazhdimin e përmbytjes në qarqet Fier dhe Vlorë.
Nga llogaritjet e fundit hidrologjike të IGJEUM, rezulton se, në pjesën fushore të këtij lumi do të ulet ndjeshëm rreziku nga përmbytja. Përgjatë mbrëmjes së sotme lumi Vjosa do të kthehet në shtratin e vet natyral. Për pjesën tjetër të territorit nuk parashikohet rrezik i shtuar nga përmbytjet e lumenjve.
Sot pasdite reshjet do të vazhdojnë, me një intensitet të dobët deri mesatar, ndërsa në qarqet e Veriut deri lokalisht intensive, të shoqëruara edhe me shtrëngata. Nesër do të këtë reshjet lokale, të dobëta të cilat do të jenë në formë dëbore në zonat e larta malore, kryesisht në veri dhe lindje të vendit.
Temperaturat minimale dhe maksimale të ajrit pritet të arrijnë; në bregdet, 5 °C / 12 °C, në vendet e ulëta, 4 °C / 12 °C, në vendet malore, -3 °C / 6 °C.
Era do të dobësohet, për të fryrë e dobët, ndërsa në bregdet deri mesatare.
