Mund të duket e çuditshme por sipas qeverisë nuk ka asnjë projekt për Teatrin Kombëtar por deri tani në publik nga ana e saj janë paraqitur vetëm koncepte.
Ministrja e Kulturës, Mirela Kumbaro pranoi sonte se deri tani nuk ka asnjë projekt për Teatrin Kombëtar por janë paraqitur vetëm koncepte. E ftuar sot në emisionin “Kjo javë” në News24, Kumbaro theksoi se është e hapur për propozime të tjera por konkrete dhe brenda hapësirave ligjore.
“Komuniteti i artistëve por edhe opinioni publik është shumë më i gjerë dhe po ta shikoni dhe në zërat që kemi në media por dhe në ato që shkëmbehen në rrjetet sociale ka një diversitet shumë të madh mendimesh. Dhe në fakt unë këtë diversitet mendimesh e marr si një vlerë të shtuar të asaj që quhet diskutim, konsultim, komunikim publik. Sepse gjithçka ndodh në sheshin e mejdanit. Dhe dua të sqaroj dhe një gjë: nuk është paraqitur projekt. Është paraqitur dhe ndarë më publikun sikurse ishte premtuar një koncept i propozuar nga një arkitekt, reputacioni i të cilit tashmë është i konfirmuar botërisht. I propozohet shtetit shqiptar një koncept për një projekt të Teatrit Kombëtar.
Jo nuk është projekt, duhet të bëjmë një dallim. Është shumë e rëndësishme të kuptojmë nuk është një projekt. Është një koncept, një propozim për një ide si mund të jetë teatri”, deklaroi Kumbaro.
