Kryeministri Edi Rama tha sot se në sistemin shëndetësor janë punësuar 153 mjekë, dhe 820 infermierë dhe të tjerë janë në radhë për tu punësuar. Ai shtoi më tej se pas janarit do kemi 300 mjekë të rinj specialistë, të cilët në bazë të meritës dhe rezultateve, do mund të zgjedhin se ku duan të kontribuojnë.
“Nuk dua të zgjatem më shumë, por dua të them se gjatë këtij viti, gjatë këtij vitit të braktisjes së Shqipërisë nga mjekët e infermierët, sipas mediave, mediat është llafi që bie, se në fakt ju e dini se çfarë janë. Këtë vit janë punësuar në sistem 153 mjekë dhe 820 infermierë dhe të tjerë janë në radhë për t’u punësuar.
Ajo që është e rëndësishme është që ne kemi garantuar rrugën e meritokracisë për mbi 4 mijë infermierë që duan të hyjnë në sistem, janë në Shqipëri. Nuk janë në Gjermani. Janë në portalin infermierë për Shqipërinë, por ndryshe nga ç’ka ndodhur për 25 e kusur vjet, nuk hyjnë më në punë as përmes partisë, as përmes krushqisë, as përmes parasë. Por vetëm nëpërmjet pikëve të fituara në testimin kombëtar të infermierëve.
Pas janarit do kemi 300 mjekë të rinj specialistë, të cilët po ashtu në bazë të meritës dhe rezultateve, do mund të zgjedhin se ku dhe nëse duan të kontribuojnë. Për të gjithë ata që duan të kontribuojnë jashtë zonave të tyre të banimit, do t’i paguajmë aq sa do merrnin sikur ta fillonin punën si mjekë në Gjermani, që ditën e parë që do të arrinin.
Aq marrin të gjithë mjekët që shkojnë jashtë Tiranës, apo qendrës së tyre të banimit që punojnë në shërbimin tonë kombëtar shëndetësor në të gjithë territorin e Shqipërisë.
Marrin rrogën si çdo mjek dhe marrin pastaj mbi rrogën 2 mijë deri në 2500 dollarë në muaj. Po të llogarisësh taksat që paguajnë këtu që janë 5-fish më të ulëta, se sa do paguanin në Gjermani. Ta bëjnë vetë llogarinë se si është më mirë, por një gjë është e sigurt; se as kemi e as do kemi mungesë mjekësh dhe infermierësh në sistemin tonë shëndetësor”, deklaroi Rama.
