Sporti në Shqipëri është i ‘sëmurë’ kur vjen puna tek financat dhe këtë po e vuan ekipi i basketbollit Tirana, i cili është detyruar të tërhiqet nga Liga Ballkanike. Futbolli mund të jetë i vetmi sport që e ka kaluar këtë ngërç, por kur sheh problemet e pafundme që ka imagjino në çfarë gjendje janë sportet e tjera.
I tillë është rasti i Tiranës për meshkuj, me klubin kryeqytetas që u tërhoq nga pjesëmarrja në Ligën Ballkanike. Bardheblutë e njoftuan vendimin e tyre në faqen zyrtare në “Facebook”, duke argumentuar se me financat që ka ekipi, është e pamundur të mbulohen shpenzimet e turneut ndërkombëtar.
Klubi provoi me të gjitha mënyrat të siguronte fondet e nevojshme, por në fund iu dorëzua realitetit të hidhur. Megjithatë, në njoftimin e bërë, klubi i Tiranës kërkoi të qetësonte tifozët rreth situatës së krijuar. Batdheblutë theksonin se mungesa e fondeve për Ligën Ballkanike nuk e ndryshon objektivin, që mbetet titulli kampion.
