“Pas lajmërimit të Ambasadës Amerikane në Tiranë për një sulm të mundshëm të elementëve të opozitës iraniane në Shqipëri, në kampin e Manzës situata paraqitet e qetë. Autoritetet herë pas here vijnë për të kontrolluar dhe vlerësuar situatën”, raporton gazetari Besar Bajraktaraj.
Agjentë të Antiterrorit ishin këtë të enjte në kampin Ashraf 3, ndërsa çdo 30 minuta aty kryhen patrullime nga ana e Policisë së Durrësit. Përfaqësuesit e kampit u kanë thënë agjentëve se situata është e qetë dhe nuk ndihen të rrezikuar.
Në kampin e muxhahedinëve Ashraf 3 jetojnë rreth 2500 persona, të cilët janë vendosur prej vitit 2018.
E njëjta situatë si në kampin e muxhahedinëve paraqitet edhe pranë ambasadës së Shteteve të Bashkuara të Amerikës në Tiranë. Agjentë civilë të policisë kriminale herë pas here kryejnë verifikime pranë selisë diplomatike.
Pavarësisht se nuk ka problematika konkrete, vëmendja e shtuar është edhe tek ambasada e Izraelit në Tiranë, por edhe seli të tjera diplomatike.
Klan News ka mësuar se autoritetet kanë shtuar vëmendjen në aeroportin e Rinasit, pikat doganore dhe sheshet kryesore.
