Sistem i korruptuar? Mark Iuliano: “Fenomeni” është djalë emocional

Gjatë ceremonisë së “Hall of Fame” të Inter, e cila u zhvillua javën e kaluar, Ronaldo “Fenomeni” bëri një deklaratë delikatë: “Kemi luftuar një sistem të korruptuar”. Me shumë gjasa kjo frazë kishte lidhje me kohën që ai ishte lojtarë i Interit dhe konkurronin me Juventusin, i cili pak vite më vonë u dënua dhe zbriti në Serie B.

Duke marrë shkas pikërisht nga ajo deklaratë, sot në mikrofonin e ‘Radio Sportiva’ ka folur Mark Iuliano, ish-mbrojtës i Juventus, që iu përgjigj akuzës së brazilianit: “Ronaldo është një djalosh emocional dhe sigurisht kur flet për Inter, duhet ta bëjë në favor”.

“Ajo Juve ishte skuadra më e fortë nga të gjitha, si në fushë ashtu edhe jashtë saj. Sistem i korruptuar? Nuk di se kujt i referohet Ronaldo, por në ato kohë, nuk komandonte vetëm Juventus, ishin shtatë motrat dhe italianet ishin skuadrat më të mira në botë. Është e lehtë të flasësh për Juven e rënë nga kategoria, për disa gjëra ekziston kujtesa e gjatë, ndërsa për të tjera ekziston vetëm ajo e shkurtra. Nga Milan, te të tjerat, pak a shumë të gjitha skuadrat patën probleme. Në çdo rast unë jam një njeri futbolli dhe për politikën futbollistike nuk më ka interesuar kurrë asgjë”, deklaroi Iuliano.