Sindikata e punonjësve të transportit hekurudhor ka paralajmëruar zhvillimin e një proteste para Ministrisë së Transporteve dhe Kryeministrisë.
Sindikata e mori këtë vendim pas indiferencës totale të Ministrisë së Transporteve, përgjegjëse e situatës, ku gjendet statusi i punonjësve të hekurudhës.
‘‘Protesta pritet që të zhvillohet në datat 18 dhe 19 prill deklaroi kreu i sindikatës’’, Osman Meta.
Nëse ministria e linjës dhe kryeministria nuk do të reagojnë, hapi vendimtar është greva e urisë, raporton ‘‘Durrës Lajme’’.
Sindikalistët do të ecin në këmbë nga sheshi “Shqiponja” drejt Ministrisë së Transporteve dhe më pas do të drejtohen para Kryeministrisë.
Në këtë protestë ata do të kërkojnë rritjen e pagës minimale dhe përmirësimin e pagave të tyre, sipas kategorive, si dhe hapjen e fronteve të punës për punonjësit, krahas rritjes së subvencioneve nga shteti për hekurudhën.
Për këtë protestë kanë firmosur paraprakisht sindikalistët e të gjitha rajoneve hekurudhore të vendit.
