SHBA ka zbuluar detaje të reja rreth dy viruseve që Koreja e Veriut po përdor për të sulmuar kompanitë dhe qeveritë.
Departamenti i Sigurisë Kombëtare (DHS) dhe FBI kanë paralajmëruar të martën për dy lloje virusesh që hakerat e Koresë së Veriut po përdorin kundër kompanive të ndryshme në industrinë e aviacionit, financave, telekomit dhe mediave.
Njëri prej tyre, i njohur si FALLCHILL, ka gjasa të jetë në përdorim që nga viti 2016 dhe i lejon hakerat të monitorojnë dhe kontrollojnë kompjuterët e infektuar në distancë. Zakonisht përhapet përmes skedarëve ose kur përdoruesit pa dashje e shkarkojnë duke vizituar faqet e infektuara të internetit.
Lloji tjetër i virusit, Volgmer, infekton kompjuterët përmes një teknike të njohur si phishing, ku përdoruesit marrin një email me një link që përhap virusin. Hakerët e Koresë së Veriut kanë përdorur Volgmer që prej vitit 2013.
FBI dhe DHS thanë se të dy viruset lidhen me HIDDEN COBRA, një term që qeveria e SHBA përdor për t’iu referuar “veprimtarisë kibernetike të qeverisë së Koresë së Veriut”.
Agjencitë e sigurisë thanë në qershor të këtij viti se HIDDEN COBRA funksionon që nga viti 2009. DHS dhe FBI gjithashtu identifikuan dhjetëra adresa të marra IP nëpër disa vende. India përfaqëson pjesën më të madhe të adresave, me rreth 25%, pasuar nga Irani dhe Pakistani.
“Kjo thekson nevojën që kombet të mbrojnë infrastrukturën e tyre për t’u siguruar që mos bëhen peng në lojën e luftës së dikujt tjetër”, tha Subramanian Udaiyappan, specialist i cybersecurity në Indi.
Koreja e Veriut lidhet me disa nga sulmet kibernetike të profilit më të lartë gjatë viteve të fundit, duke përfshirë një vjedhje prej 101 milionë dollarësh nga banka qendrore e Bangladeshit. (TIRANA TODAY)
