Qazim Shemaj i njohur për vargjet e tij lirike, por dhe për lidhjen e ngushtë me letërsinë ruse, prej së cilës ka sjellë në shqip vargje të poetëve të mrekullueshëm të kësaj kulture, është ndarë nga jeta në moshën 67- vjeçare, pas një sëmundjeje të rëndë. Ikja e tij është një humbje për letrat shqipe, që humbën një prej dashnorëve të fundit jo vetëm të përkthimit, por edhe poezisë.
Shemaj i përket asaj plejade shkrimtarësh që karrierën e tyre e ngritën para viteve 90-të, duke u përballur përmes krijmtarisë me soc-realizmin. Emri i tij figuron në një pjesë të rëndësishme të prodhimit letrar pas viteve 80-të, duke qënë një zë i njohur jo vetëm i poezisë, por edhe i kritikës letrare. Ai lindi më 5 mars 1950, në fshatin Qesarak të Tepelenës. Shemaj u diplomua në Universitetin e Gjirokastrës në degën e Gjuhë-Letërsisë. Ai mori më pas një diplomë pasuniversitare në degën e Kritikës letrare në këtë Universitet. Punoi fillimisht si mësues e, më pas, si zëvendës lektor në universitetin Eqrem Cabej.
Që nga viti 1986, ai ka qënë redaktor i Revistës Hosteni dhe i gazetës Drita. Shemaj është themelues dhe redaktor i revistës letrare Mjelma dhe Kacamicri, të dyja revista për fëmijë. Ai ka krijuar dhe një revistë letrare AG si dhe është autor i disa librave. Është autor i disa përmbledhjeve me lirika. Për krijmtarinë e tij janë shprehur autorë, si: Dritëro Agolli, Sadik Bejko, Perikli Jorgoni, Bedri Dedja, Nasho Jorgaqi etj.
Dy vjet më parë, më 17 nëntor 2015, me rastin e 70-vjetorit të krijimit të Shoqatës së Miqësisë “Shqipëri-Rusi”, Rusia e nderoi me Medaljen e Artë që mban emrin e Pushkinit, me motivacionin “Për besnikëri ndaj fjalës dhe punës”, për meritat e tij në popullarizimin e literaturës ruse në Shqipëri”.
