Ndriçim Shtubina do të jetë pjesë e Laçit në pjesën e dytë të sezonit në Superiore, pas largimit nga Kukësi. Shkodrani ka pritur një ofertë nga ekipi i Vllaznisë, por nuk është kontaktuar as nuk ka pasur ndonjë ofertë nga drejtuesit shkodranë. Në një intervistë për “TV1 Channel” flet edhe për trajnerin Gjoka, për të cilin thotë se Vllaznia nuk i intereson shumë atij.
“Të them të drejtën e kam pritur një kontakt me drejtuesit, gjithsesi nuk më ka kontaktuar kush dhe unë bëra zgjedhjen time, pasi drejtuesit e Laçit më kanë kontaktuar dy-tri herë rresht dhe kur e pashë që diçka në Shkodër nuk shkon, atëherë vendosa të firmosja direkt me Laçin. Më vjen keq për situatën, sepse dita-ditës po rëndohet më shumë. Njerëzit mendojnë se do gjendet zgjidhja, por unë tani kam edhe eksperiencë në futbollin tonë dhe e shoh se situata nuk është e mirë, me gjithë dëshirën e drejtuesve, por ndoshta edhe nuk janë në dijeni të situatave, ndoshta edhe nuk dinë dhe e bëjnë pa dashje.
Unë them se edhe disa emra lojtarësh që përmenden në gazeta e nëpër portale, të kenë kujdes sepse nuk janë për Vllazninë. Flas ngaqë unë e dua Vllazninë dhe mund ta jap edhe ndonjë këshillë, por gjithsesi ndoshta ata nuk e duan mendimin tim. Mund të veprojnë si kanë dëshirë, por ngaqë ka specialistë në Shkodër, ka ish-futbollistë që munden me e dhanë një mendim për blerjet. Unë mund të thosha që mos t’ia lënë çdo gjë trajnerit, sepse trajneri nuk është shkodran dhe nuk i djeg shumë për Vllazninë”, thotë Shtubina në “TV1 Channel”.
