Pas një sërë reagimesh të cilat kanë pushtuar rrjetet sociale, në lidhje me aktin e pështirë nga ana e gjyqtarit nga Fieri, qëndrimi i radhës publik vjen Këshilli i Lartë Gjyqësor (KLGJ).
KLGJ shpreh indinjatën e thellë për këtë rast, dhe thotë se kjo është edhe një prej shkaqeve se pse Reforma në Drejtësi ishte domosdoshmëri. Po kështu, KLGJ garanton opinionin publik se do të bashkëpunojë pa asnjë rezervë, me çdo institucion shtetëror, për verifikime sa më transparente dhe profesionale ndaj çdo gjyqtari të dyshuar për përfshirje në veprimtari të paligjshme apo korruptive.
REAGIMI I PLOTË I KLGJ:
“Këshilli i Lartë Gjyqësor, pasi u njoh me videon e shfaqur në mbrëmjen e datës 08.01.2019, në emisionin investigativ “STOP”, televizioni kombëtar “KLAN”, shpreh shqetësimin dhe indinjatën e thellë për ngjarjen dhe për implikimin e mundshëm të gjyqtarit, apo gjyqtarëve të përmendur në këtë emision.
Këshilli Lartë Gjyqësor, duke vlerësuar sjelljet dhe veprimet e gjyqtarit në raport me ligjin, nxit shqyrtimin dhe verifikimin e plotë të gjithë kësaj ngjarje, nga strukturat përkatëse. Shkeljet e rënda të etikës dhe që diskreditojnë rëndë figurën e gjyqtarit, ishin arsye për të cilën Reforma në Drejtësi doli si domosdoshmëri, dhe do të jetë arsye që kjo reformë, me të gjithë institucionet e reja të sapo ngritura, të vijojë përpara betejën ndaj çdo lloj korrupsioni të shfaqur, në të gjitha nivelet, me qëllimin final sigurimin e sundimit të ligjit, pavarësinë dhe eficiencën e gjyqësorit.
Duke falenderuar emisionet televizive investigative, si dhe të gjithë qytetarët, për kontributin e tyre, në bërjen publike të rasteve korruptive, KLGJ garanton opinionin publik se do të bashkëpunojë pa asnjë rezervë, me çdo institucion shtetëror, për verifikime sa më transparente dhe profesionale ndaj çdo gjyqtari të dyshuar për përfshirje në veprimtari të paligjshme apo korruptive”, thuhet në reagim.
Historia shokuese u publikua një natë më parë në emisionin “Stop”, ku një nënë, u përball me kërkesën e gjyqtarit të Fierit, Roland Hysi, për raport seksual dhe para, vetëm për të siguruar kujdestarinë e fëmijës së saj.
