Në botërorin e futbollit që do të organizohet verën e këtij viti në Rusi, pritet të ketë zhvillime spektakolare. Por ajo që bën diferencën është përdorimi i sistemit VAR në një kompeticion kaq të rëndësishëm. Ky sistem është testuar anembanë globit dhe ka rezultuar se është i suksesshëm dhe vendos drejtësi në fushë. Filip Lë Flok, drejtues i FIFA-s, i parapriu të gjithëve në një vendim që përflitej, por ende nuk kishte marrë OK përfundimtar për shkak të protestave dhe kritikave se i zbeh emocionet e lojës më popullore.
“Mendoj se është fantastike të përdorim teknologjinë në futboll, pasi na siguron drejtësi duke evituar gabime të qarta dhe të dukshme për këdo. Ka disa kompani në këtë sektor që kanë treguar interes të madh për projektin tonë për Botërorin”, tha drejtuesi i FIFA-s.
Nëse shohim futbollin italian tashmë të gjithë janë mësuar me ndalimin e lojës për të rishikuar aksionet e dyshimta, për ndërhyrje të ashpra apo kur topi kalon vijën fatale. Sipas idesë së FIFA-s, gjatë përsëritjes së imazheve për episodin e kontestuar do të ketë hapësirë për sponsorizimin e një produkti teknologjik, pikërisht atëherë kur tensioni mes tifozëve do të jetë në kulmin e tij.
Vendimi përfundimtar do të merret në fillim të marsit, por FIFA ka nisur që tani të testojë opinionin me videoarbitrimin edhe në nivel kaq të lartë.
