Pas takimit të mbajtur gjatë paradites së sotme me një përfaqësi të banorëve të Astirit, presidenti Ilir Meta ka bërë publik pak orë më vonë qëndrimin lidhur me projektin e “Unazës së Madhe”.
Ai i ka dhënë shuplakë institucioneve publike, pasi shprehet se nuk i kanë dhënë informacionin e kërkuar për segmentin rrugor “mbikalimi i pallatit me shigjeta-rrethrrotullimi i sheshit “shqiponja”, pavarësisht se pretendon se kjo kërkesë i është bërë disa herë.
Gjithashtu Meta ka kërkuar anulimin e menjëhershëm të projektit të “Unazës së Madhe”, pasi sipas tij, ka konstatuar se paraqet shkelje të shumta ligjore.
“Mosdhënia e informacionit ndaj Presidentit të Republikës, i cili është kërkuar në mënyrë të përsëritur prej tij, forcon bindjen se këtij projekti i ka munguar qëllimisht transparenca në çdo hallkë të procesit në kundërshtim me rendin kushtetues dhe juridik të Republikës së Shqipërisë”, citohet në reagimin e presidentit Meta.
