Sot do të shqyrtohet në Kuvend kërkesa e Prokurorisë pranë Gjykatës së Shkallës së Parë për Krimet e Rënda në Tiranë, “Për dhënien e autorizimit për arrestimin dhe heqjen e lirisë së deputetit të Kuvendit të Republikës së Shqipërisë, Saimir Tahiri”.
Fillimisht, në seancë plenare do t’i jepet në fillim deputetit Saimir Tahiri, ndaj të cilit është paraqitur kërkesa e Prokurorisë së Krimeve të Rënda si i implikuar në trafikun ndërkombëtar të drogës.
Në mbledhjen e Kuvendit do të dëgjohen dy raporte nga Këshilli për Rregulloren, Mandatet dhe Imunitetin, rekomandimi i shumicës parlamentare dhe rekomandimi i pakicës parlamentare, ndërsa më pas do të votohet nga deputetët.
Dje, në një konferencë për mediet, Tahiri tha se nëse ka deputet që mendon se ai duhet të arrestohet, le të votojë pro arrestimit të tij. Ndërkohë, kryeministri Edi Rama ka deklaruar se grupi i PS do të votojë unanimisht pro hetimit të Tahirit dhe kundër arrestimit të tij.
Në rend të ditës për seancën e sotme janë edhe “Miratimi i procesverbalit të seancës plenare të datës 12 tetor. Njoftimi i projektligjeve të depozituara në Kuvend. Njoftimi dhe miratimi i programit të punimeve të Kuvendit për periudhën në vijim. Njoftimi dhe miratimi i kalendarit 3 javor të punimeve të Kuvendit për periudhën në vijim. Si dhe më pas diskutime për çështje jashtë rendit të ditës deri në 60 minuta”.
