Ai ishte 6 vite pjesë e Manchester Cityt, por në fund Guardiola vendosi që të mos e bënte pjesë të planeve të tij dhe e largoi. Bersant Celina, futbollisti i përfaqësueses së Kosovës është duke kaluar një formë mjaft të mirë te skuadra e re, Swansea.
Asnjë shans nuk i dha Guardiola në drejtimin e tij këtij lojtari, megjithëse trajneri në fjalë shquhet për një nuhatje të madhe dhe besim që i jep futbollistëve të rinj. Fatkeqësisht kjo nuk ndodhi me sulmuesin e Kosovës, që mendon se është gati t’i vërtetojë Guardiolës sesa gabojë me të.
Swansea arriti të kalonte më tej në FA Cup, pas asaj fitore me rezultatin 4-1 ndaj Gillingamit, ndërsa Celina realizoi një perlë më vete. Tashmë ai shpreson te përballja me Cityn në Kupë, për të treguar gjithë vlerat e tij:
“Unë jam një tifoz i Cityt, por nëse vij si kundërshtar, dua t’i nxjerr nga Kupa. Dëshiroj shumë t’u tregoj sesa i mirë që jam dhe sesa gabuan me mua, që më lanë të largohesha nga skuadra. Kam ende lidhje me pjesëtarë të asaj skuadre, që më dërgojnë mesazhe për gola të bukur që realizoj me Swansean. Mund të shkojmë për t’i mundur, sepse kemi të njëjtën stil loje me ta”, u shpreh Celina për “Daily Mail”.
