Shqiptarët po udhëtojnë çdo ditë e më shumë. Kështu rezulton sipas një raporti të publikuar nga INSTAT, ku të dhënat tregojnë për një rritje të numrit të fluturimeve ajrore, si dhe një rritje të udhëtimeve me linjë detare.
Konkretisht, numri i fluturimeve në shtator të këtij viti është 2.390, duke shënuar një rritje me 12, 5% krahasuar me shtatorin e vitit të kaluar.
Përsa i përket nëntëmujorit të 2017-ës, janë kryer 18.266 fluturime, duke u rritur me 11,3%, krahasuar me të njëjtën periudhë të një viti më parë.
Në muajin shtator, 267.104 pasagjerë kanë udhëtuar me linja ajrore, shifër kjo që është rritur me 24,4% krahasuar me shtatorin e 2016-ës. Ndërkohë, numri i pasagjerëve që kanë udhëtuar me linja ajrore në nëntëmujorin e parë të 2017-ës është 2.008.811, shifër kjo mjaft e lartë e cila është rritur me 24,6 %, krahasuar me të njëjtën periudhë të një viti më parë.
Udhëtimet me linjë detare
Numri i pasagjerëve që kanë udhëtuar me linjë detare në shtator 2017 është 170.161 persona, duke u rritur me 21,3% krahasuar me shtator 2016.
Në nëntëmujorin e 2017, kanë udhëtuar me linjë detare 1.290.481 pasagjerë, duke u rritur me 19,6 %, krahasuar me të njëjtën periudhë të një viti më parë.
