Nga Kastriot Dervishi
Taulant Muka në një nga postimet e fundit, na përforcoi faktin se vendi është prej kohësh pa qeverisje. Muka në cilësinë e dëshmitarit këtë herë, na rrëfeu një anë të padukshme të qeverisë, organizimin e propagandës dhe kërkimin e llogarisë për rendimentin e saj në rrjetet sociale. Qeveria punonte me grafik se cili institucion ishte më mirë me propagandë, ose siç thuhej dikur me agjitpropin. Kjo ishte e rëndësishme. Të tjerat nuk vlejnë.
Edhe ky mesazh, te publiku ynë kaloi pa shumë përshtypje. Sepse nuk shihen gjërat e mira, as krahasohemi me të huajt. Merrni shihni vendet e tjera, atje ku koha është e çmuar për punë. Askund nuk do shihni kryeministra apo ministra të humbin kohën me orë të tëra për gjëra të pavlera, estrada apo batuta. Kryebashkiakët e vendeve ballkanike, lëre pastaj ata të perëndimit, nuk do t’i shihni kurrë duke përuruar lavamanë çerdhesh, kopshtesh, etj.
Këshilli i Ministrave sipas kushtetutës është përcaktuesi i drejtimeve kryesore të politikës së përgjithshme shtetërore. Me sa duket, politikë shtetërore është mosqeverisja nëpërmjet propagandës. Imagjino të flasësh për konsolidim institucionesh, për arkiva (çdo institucion i ka copë-copë), për njerëz inteligjentë, etj, kur injoranca mbulohet nëpërmjet propagandës.
Shfaqja e një realiteti krejt tjetër nga ai që ekziston është synimi kryesor i qeverisë. Kjo është më se e qartë dhe e kuptueshme. Në kushtet e një mosqeverisje të plotë, nga mëngjesi e deri në darkë flitet për arritje të mëdha, në një kohë që vendi braktiset përditë. Nuk mund të jesh aktor dhe shtetar njëherësh. Këta tanët kanë zgjedhur të jenë aktorë. Ministrat kanë kaluar orët e punës së aktorëve të telenovelave. Kryetari i bashkisë së kryeqytetit filmon vetveten dhe zë vend të posaçëm me lajme komunale të parëndësishme. Të gjithëve u mungon ana administrative, ajo që quhet puna e zyrës, tërësisht. Udhëhiqen nga formaliteti. Nëse doni të dini cili është zyrtari më i paaftë e më i dobët, mjafton të shihni sa orë në ditë ka braktisur detyrën dhe është në media. Sa më shumë të jesh i pranishëm në media, aq më pak je në punë.
Administrata e sotme gjendet përpara një kolapsi tjetër që ka të bëjë me formalitetin në punë dhe mosshkëputjen nga normat komuniste të vlerësimit. Ende vijojnë praktika enveriste me plane 3-mujore, 6-mujore, 9-mujore, analiza vjetore, etj. Të gjitha janë forma që përdorin injorantët për t’u dukur sikur dinë të punojnë. Ndryshojnë shifrat e qëndrojnë brenda tabelave të injorancës. Çdo normë enveriste e punës duhet neveritur e flakur sepse vetëm e dëmshme është. Shqipëria duhet të ketë model administratën perëndimore, në radhë të parë atë gjermane, amerikane, etj.
