Pas plot 30 ditësh fushatë elektorale, më në fund Shqipëria është zgjuar sot në heshtje zgjedhore, në pritje për t’u drejtuar nesër drejt qendrave të votimit për të vendosur fatin se kush do e qeverisë vendin në katër vitet e ardhshme.
Partitë më të mëdha mbyllën dje në mbrëmje fushatën me mitingjet e fundit, ndërsa sot pritet të respektohet heshtja zgjedhore, në zbatim të nenit 77 të kodit zgjedhor.
“Dita përpara datës së zgjedhjeve dhe data e zgjedhjeve, deri në orën e mbylljes së votimit, formojnë periudhën e heshtjes zgjedhore. Në periudhën e heshtjes zgjedhore nuk lejohet asnjë lloj fushate zgjedhore nëpërmjet organeve të medias, si dhe zhvillimi i mitingjeve ose i veprimtarive të tjera zgjedhore të subjekteve zgjedhore”, thuhet në nenin 77 të Kodit Zgjedhor.
Por, çfarë ndodh nëse një subjekt politik, apo një media thyen heshtjen zgjedhore?
Sipas nenit 174 të kodit zgjedhor, nëse një subjekt thyen heshtjen zgjedhore, gjobitet nga KQZ me 500 mijë lekë, ndërsa për mediet parashikohet gjobë nga KQZ në vlerë 2 milionë lekë të reja.
Në zgjedhjet parlamentare janë ftuar të votojnë 3.451.896 shtetas, ndër të cilët 136.239 zgjedhës votojnë për herë të parë.
Shqiptarët do votojnë për 18 parti, të cilat garojnë më vete dhe jo në koalicione parazgjedhore siç ka ndodhur më parë, ku do të zgjedhin 140 deputetët e rinj të kuvendit.
