Alban Bushi u shfaq optimist se kuqezinjtë e rinj do ta nisin me një fitore aventurën në grupin 2 kualifikues, gjithmonë nëse japin maksimumin në fushë.
Ëndrra e përfaqësueses Shpresa të Shqipërisë për tu kualifikuar në Europianin e vitit 2019-të, kalon nga Estonia. Sot ne 20:00 te rinjtë e kombëtares do të përballen me Estoninë.
” Ëndërrojmë vendin e parë, asgjë nuk është e pamundur por për të ëndërruar kualifikimin duhet të fitojmë ndaj Estonisë”
Endri Cekici, Qazim Laci e Leonardo Maloku do të jenë disa nga mungesat e rëndësishme të përfaqësues së 21-vjeçarëve në sfidën ndaj Estonisë, një kundërshtar të cilin trajneri Bushi e vlerëson maksimalisht.
” Fitore te sigurte nuk ka ndaj asnjë ekipi, kombëtarja U21 ka prurje te reja. Ekipi ynë luan mirë në bllok, mbrojtje-sulm. Kemi 80-90 futbolliste që i mbajmë në vëzhgim, pavarësisht që në këtë ndeshje kemi disa mungesa, jam shume i kënaqur me gjendjen e ekipit”.
Në Elbasan Arena këtë të Hënë, Shqipëria ka nevojë për mbështetjen e tifozëve me Bushin që u bëri thirrje fansave të japin një dorë drejt suksesit kombëtares Shpresa me praninë e tyre në stadium.
” Tifozët janë mbështetja jonë. Duam të luajmë mirë dhe të fitojmë edhe për ta, shpresoj të jenë të shumtë në stadium”.
Ashtu si trajneri edhe kapiteni Keidi Bare nënvizoi se Estonia është një kundërshtar i vështirë për tu kaluar.
“Estonia është ekip i cili në fazën mbrojtëse luan mirë, ka lojtare të shpejtë dhe teknike. E vendos trajneri kapitenin, është një vendim i tij. Ndeshja me Francën ishte një test. Synojmë që nesër ndeshjen e parë ne grup ta nisim me këmbë të mbarë”.
Shqipëria e 21-vjeçarëve është në një grup me skuadra të tilla si Spanja, Sllovakia, Islanda, Irlanda e Veriut e Estonia, por mesfushori i Atletico së Madridit nuk i trembet askujt dhe e përcakton qartë objektivin e kuqezinjëve të rinj në këto eliminatore.