Policia ka arrestuar një 18-vjeçar në lidhje me sulmin terrorist në metronë e Londrës, ku nga shpërthimi në një vagon mbetën të plagosur 29 persona.
Autoritetet britanike thonë se i riu u arrestua në zonën e portit të Dover sot në mëngjes. Ai u arrestua për akuzat e terrorizmit dhe po mbahet në një stacion policor lokal.
Ndërkohë një zyrtar i policisë tha se hetimi vazhdon dhe niveli i kërcënimit mbetet ende i lartë.
“Publiku duhet të mbetet vigjilent pasi stafi, zyrtarët dhe partnerët tanë vazhdojnë të punojnë në këtë hetim kompleks”, ka deklaruar zytari i lartë i policisë.
Policia ka deklaruar gjithashtu se për arsye të forta hetimore ne nuk do të jepen më shumë hollësi për njeriun që është arrestuar si i dyshuar për këtë sulm.
Ndërkaq, përgjegjësinë për sulmin në metronë e Londrës e mori i ashtuquajturi Shteti Islamik.
