Arturo Vidal është përfshirë në një skandal në një kazino në Kili, ku u desh ndërhyrja e policisë mëngjesin e së martës. Mesfushori i Bajernit mohon të jetë pjesë e skandalit, ndërkohë që pranon se ndodhej në kazino mbrëmjen e së hënës. Vidal ndodhej me familjen e tij dhe miqtë në kazinonë e hotelit “Monticello”, 50 km në jug të Santiagos.
Festa zgjati deri në orët e para të së martës, kur u lajmërua policia nga shërbimi i sigurisë së hotelit pas trazirave që ishin shkaktuar të pranishmit. Disa orë më vonë, Vidal u stërvit normalisht me kombëtaren përpara ndeshjes kualifikuese të Botërorit, kundër Paraguait.
30- vjeçari akuzon mediat se tentojnë ta njollosin emrin e tij duke shpikur gjithnjë histori. Vidal pranoi në lot se ai nuk kishte thyer asnjë rregull. Edhe policia konfirmoi se ai nuk ndodhej në hotel kur ata kishin shkuar në orën 06:30.
“Jam i zemëruar. Këto lajme më kanë sjellë telashe. Unë kam familje. Gruaja më telefonoi për të pyetur se çfarë po ndodhte, por ajo më beson. Unë isha në kazino me miqtë, hëngra darkë dhe shkova në shtëpi si profesionist që jam. Nuk mund të kontrolloj ato që bëjnë shokët. Edhe trajneri Pici më pyeti se çfarë kishte ndodhur”, tha Vidal.
Dy vite më parë, mesfushorit iu pezullua patenta pasi përplasi Ferrarin ndërsa kthehej nga kazinoja “Monticello” dhe ishte nën ndikimin e alkoolit.
