Qeveria ka vendosur të unifikojë shpërblimet për punonjësit e Policisë së Shtetit, duke miratuar një vendim që përcakton kritere të reja dhe të qarta për shpërblimet deri në tre paga mujore në vit.
Propozimi, i paraqitur nga Ministria e Brendshme, u miratua sot nga Këshilli i Ministrave. Sipas vendimit, shpërblimet do të bazohen në tetë kritere kryesore që lidhen me performancën dhe rezultatet e punonjësve. Përzgjedhja e përfituesve do të bëhet nga Drejtori i Përgjithshëm i Policisë së Shtetit, në bazë të propozimeve të titullarëve të njësive shpenzuese dhe drejtuesve të strukturave policore.
Propozimet do të shoqërohen me një relacion shpjegues për çdo rast. Kriteret përfshijnë kryerjen e operacioneve të sigurisë së veçantë dhe zgjidhjen e situatave të jashtëzakonshme për rendin dhe sigurinë publike, parandalimin e ngjarjeve të rënda kriminale, kapjen e personave të rrezikshëm në kërkim ose të autorëve të armatosur të veprave penale, zbulimin, hetimin dhe arrestimin e autorëve të ngjarjeve kriminale me ndikim të madh publik, hetimin dhe ndalimin e autorëve të krimit të organizuar, korrupsionit, pastrimit të parave dhe krimit ekonomik, zbulimin dhe ndalimin e grupeve të strukturuara kriminale dhe organizatave kriminale, operacionet për shpëtimin e jetës së njerëzve në kushte emergjencash civile dhe kontributin për rritjen e standardeve të punës në fushën e sigurisë publike dhe rezultate të larta krahasuar me periudhat e mëparshme.
Vendimi përfshin gjithashtu ndryshime në pagat e policëve, të ndara sipas gradave dhe vjetërsisë. Shtesa të veçanta pagash do të ketë për ata që punojnë në kushte të vështira ose në zona të largëta. Për gradat më të ulëta si “Inspektor”, është garantuar që pagat dhe shtesat aktuale do të mbeten të njëjta deri në janar 2026, pavarësisht ndryshimeve ligjore.
Punonjësit që bashkëpunojnë me institucionet e arsimit policor do të përfitojnë pagesa shtesë për orët mësimore, ku për trajnime të gradës “Inspektor” përfitohen 600 lekë për orë, për gradat “Nënkomisar” dhe “Komisar” përfitohen 800 lekë për orë, ndërsa për gradat e larta, nga “Kryekomisar” deri te “Drejtues i Parë”, përfitohen 1000 lekë për orë. Vendimi hyn në fuqi menjëherë pas botimit në Fletoren Zyrtare dhe ngarkon Ministrinë e Brendshme dhe Drejtorinë e Përgjithshme të Policisë së Shtetit për zbatimin e tij.
