Një tjetër zë pro i shtohet dialogut Kosovë-Serbi. Kreu i PSD-së dhe njëkohësisht bashkëkryesuesi i ekipit negociator Shpend Ahmeti ka deklaruar se duhet të pezullohet taksa për t’i dhënë një shans dialogut. Por sipas tij, nëse dialogu nuk ka sukses atëherë taksa duhet të hyjë në fuqi menjëherë.
Ai ka kritikuar disi qëndrimin e Haradinajt, teksa deklaroi se për këtë çështje duhet marrë një vendim i përbashkët i të gjitha partive politike në Kosovë.
“Taksa është e drejtë, por nuk është mirë që Haradinaj të ndihet i vetmuar në këtë çështje, duhet koordinim dhe nëse merret vendim të merret bashkërisht”, ka deklaruar Ahmeti.
Sipas Ahmetit, të martën e javës tjetër do të dorëzohet në Kuvend platforma për bisedime, derisa komunikatën e sotme të LDK-së dhe LVV-së e ka quajtur për keqardhje, pasi sipas tij të gjitha gjërat që i kanë kërkuar i kanë pasur në platformën që e ka propozuar PSD-ja muaj më parë.
