Shoqatat Rajonale duket se nuk janë vetëm problem i Shqipërisë kur bëhet fjalë për zgjedhjet në Federatën e Futbollit. Edhe Kroacia është prekur nga një skandal i tillë dhe përfundimi ka qenë drastik për presidentin e federatës, Davor Shuker. Federata Kroate e Futbollit ka shkarkuar drejtuesin e saj pasi u konstatuan parregullsi në procesin e zgjedhjeve. Një gjë e tillë pretendohet se ndodhi edhe në mbledhjen e Asamblesë që rizgjodhi për të pestën herë Armand Dukën si president i FSHF-së, ku ka pasur edhe një denoncim në prokurori nga klubi i Flamurtarit dhe kandidatit Bashkim Fino, por nuk dihet cili do të jetë fati i Dukës.
Legjenda e futbollit kroat u rizgjodh më 22 dhjetor si presidenti i federatës së këtij vendi nga Asambleja. Por Inspektoriati i Sportit në Kroaci zbuloi se votues kishin qenë edhe persona të cilët nuk duhej të kishin marrë pjesë në votim dhe si autoritet më i lartë sportiv, cilëson këto zgjedhje të pavlefshme.
Sipas protokollit, rezultojnë si votues edhe Dubravko Galoviç, Stjepan Merkash, Ante Vuçemiloviç-Shimunoviç, Drago Luciç dhe Davor Iviç, të gjithë përfaqësues të shoqatave rajonale të futbollit në Kroaci.
Por asnjë prej tyre nuk duhej të kishte votuar pasi ata janë përfaqësuesit e shoqatave përkatëse në Komitetin Ekzekutiv dhe nuk duhej të lejoheshin ta bënin një gjë të tillë, duke vepruar kësisoj kundër statutit dhe ligjit.
Kësisoj, Inspektorati i Sportit në Kroaci i cilësoi zgjedhjet e parregullta e si rrjedhojë edhe Shuker të jashtëligjshëm, ndërsa shumë shpejt do të caktojë datën e zgjedhjeve të reja.
Shuker garonte përballë ish-futbollistit të njohur kroat, Dario Simiç, i cili i kontestoi zgjedhjet dhe tani me shumë mundësi do të ketë një avantazh të ndjeshëm në ato të radhës, pasi u zbuluan manipulimet e presidentit në detyrë që kërkonte rizgjedhjen.
