Në media është folur shumë për tradhtinë që i është bërë komandantit legjendar Adem Jasharit. Në momentin që Jashari kishte më shumë nevojë për ndihmë, kur ishte rrethuar nga forcat serbe, komandantët e tjerë e lanë vetëm. U fajësuan njerëz të ndryshëm për tradhtinë ndaj komandantit, megjithatë askush nuk e mori përsipër përgjegjësinë për atë që ndodhi në Prekaz 20 vite më parë.
Miku i ngushtë i Adem Jasharit, Skender Zogaj ka sqaruar se si qëndron e vërteta me komandant Jasharin. Zogaj që e kishte njohur nga afër komandantin legjendar, Adem Jashari flet për këtë tradhti që i ishte bërë atij në momentet e ballafaqimit me kriminelët serbë.
Ai thotë se ka pasur një shmangie ndaj luftës që u zhvillua atë ditë në Prekaz dhe komandantët që atë ditë nuk ndërmorën asgjë për t’i dalë në krahë duhet të turpërohen kur përmendin emrin e komandantit Adem Jashari sot.
“Nuk mund të them se ka pasur tradhti, por ka pasur shmangie nga lufta konkrete që është zhvilluar në Prekaz dhe, komandantëve që atë ditë nuk kanë ndërmarrë asgjë për t’i dalë krah, u përket një hije e fortë e turpit dhe kur ta përmendin emrin e Adem Jasharit duhet të skuqen! Ka të atillë komandantë që i janë gëzuar vdekjes së Adem Jasharit, duke e konsideruar ushtar të Ibrahim Rugovës! Disa nga të këtillët tash flasin me “pikëllim” kur vendosin lule te varret në Prekaz”, thotë Zogaj.
Zogaj thotë se veprimtaria luftarake e Adem Jasharit ka qenë tepër e veçantë për faktin se çështjes së rezistencës kundër okupatorit serb iu ka rrekur me përqendrim dhe vendosmëri të jashtëzakonshme të bazuar në forcat e veta për vetëmbrojtjen e pragut të shtëpisë, si hap themelor i strategjisë drejtë organizimit të rezistencës së plotë gjithëpopullore.
“Mirëpo, siç dihet, kjo nuk ndodhi për shkak të një varg dobësish që shfaqen më frontin luftërat, që nuk arriti të unifikohet dhe kjo e dëmtoi shumë luftën çlirimtare! Ndonëse saktësisht nuk janë të njohura përpjekjet bashkëpunuese të Adem Jasharit me grupet e ndryshme luftarake, një gjë është mirë e njohur, se në çastet e duhura të ballafaqimit të familjes Jashari me forcat serbe, mungoi ndihma e duhur e grupeve të armatosura të rrethinës dhe Adem Jashari luftoi familjarisht me ushtrime serbe deri ne frymën e fundit”, thekson Zogaj.
