Një muaj më parë, ekipi i Shkumbinit në Peqin u dënua nga Komisioni i Disiplinës Sportive, pasi në ndeshjen e luajtur kundër Naftëtarit, arbitri i ndeshjes pati një incident me lojtarët. Ngjarja është e tillë, arbitri jep një faull në favor të skuadrës mike, ndërsa lojtarët e Shkumbinit afrohen duke protestuar. Arbitri, Alvi Paço, për një moment rrëzohet në fushë, duke u hequr si i dëmtuar, por në fakt ishte një simulim i kryer nga gjyqtari i ndeshjes.
Për këtë arsye, Komisioni i Disiplinës në FSHF, me vendimin e datës 16.11.2018, e dënoi klubin peqinas me humbje të ndeshjes në tavolinë dhe një gjobë prej 100 mijë lekësh. Mirëpo ky vendim nuk u pranua nga klubi i Shkumbinit, që vendosi të apelonte vendimin. Drejtësia nuk ka vonuar më shumë se një muaj nga ngjarja, teksa Komisioni i Apelit të Disiplinës, ka rrëzuar vendimin e datës 16 nëntor, duke e shfajësuar skuadrën e Shkumbinit. Për më tepër lexoni të plotë vendimin e Komisionit të Apelit.
Video e ditës së ndeshjes ku shihet veprimi i gjyqtarit Alvi Paço.
VENDIM:
Me vendimin nr. 15 datë 16.11.2018 (pika 15) Komisioni i Disiplinës pranë FSHF ka vendosur:
KF “Shkumbini”, për akte dhune ndaj zyrtarëve të ndeshjes, në bazë të Nenit 56, 134/2, 49/3, 49/4 të KDS, dënohet me humbjen e ndeshjes në tavolin me rezultin 3 me 0 kundër KF “Naftëtari”, zbritjen e 3 pikëve nga klasifikimi dhe gjobë në masën 100.000 (njëqindmijë) Lek . Në aplikim të Nenit 136/1.b të KDS, gjoba paguhet në masën 20%.
Kundër këtij vendimi ka ushtruar kërkesë ankimore lojtari i KF “Shkumbini” duke kërkuar ndryshimin e pikës 15 të Vendimit të Komisionit të Disiplinës datë 16.11.2018 pasi masa e dënimit nuk i përgjigjet rrethanave të shkeljes së kryer.
KOMISIONI I APELIT TË DISIPLINËS
Pasi dëgjoi relatimin e çështjes nga sekretariati teknik dhe si bisedoi e analizoi çështjen në tërësi, konstaton:
Vendimi nr.15 datë 16.11.2018 (pika 15) i Komisionit të Disiplinës pranë FSHF nuk është marrë në përputhje me Kodin e Disiplinës Sportive pasi masa e dënimit të aplikuar është e lartë dhe nuk i përgjigjet shkeljes disiplinore të kryer. Nga pamjet filmike të paraqitura nuk u gjenden shkelje që justifikojnë dënimin e KF “Shkumbini”.
PËR KËTO ARSYE
Bazuar në nenet 78 e vijues të Kodit të Disiplinës Sportive
VENDOSI
1-Shfuqizimin e pikës 15 të vendimit nr.15 datë 16.11.2018 të Komisionit të Disiplinës pranë FSHF si të pa bazuar në Kodin e Disiplinës Sportive.
2-Kundër këtij vendimi lejohet ankim në Gjykatën e Arbitrazhit Sportiv (CAS/TAS) Lozanë Zvicër.
Po kush është arbitri Alvi Paço? Ai është arbitri që u dhunua brutalisht nga futbollistët e Këlcyrës në një përballje derbi që këta të fundit kishin me Përmetin. Disiplina u tregua e pamëshirshme me skuadrën dhe me disa lojtarë në veçanti, pas kësaj ngjarje.
Drejtuesit e klubit dhe futbollistët asokohe kërkuan që të bëhej një hetim për atë rast, pasi ishin të bindur që arbitri Paço kishte marrë një shumë të caktuar parash për ta çuar ndeshjen në një rezultat të caktuar.
“Arenë lufte” në Përmet, lojtarët e Këlcyrës masakrojnë arbitrin (Video)
