Është rritur numri i nxënësve të asfiksuar nga rrjedhja e gazit në gjimnazin e Shupenzës, duke shkuar në 60. Lidhur me këtë ngjarje ka reaguar mjeku i spitalit rajonal i Bulqizës, i cili ka thënë se kanë shkuar dy grupe nxënësish që kanë shfaqur probleme shëndetësore pasi janë asfiksuar si pasojë e vendosjes në punë të kaldajës së ngrohjes në shkollë.
Sipas tij, një pjesë e tyre janë dërguar drejt Peshkopisë pasi në spitalin e Bulqizës nuk ka kapacitet për trajtimin e nxënësve. Ndërkohë bëhet e ditur se një 16-vjeçar është nisur me helikopter drejt Tiranës, për ndihmë më të specializuar.
Njoftimi i plotë i policisë:
Shupenzë-Bulqizë
Në vijim të informacionit paraprak ku bën fjalë për disa nxënës të një shkolle të mesme që janë asfiksuar si pasojë e tymit të shkaktuar nga kaldajat ju informojmë se :
34 nxënës po marrin ndihmë mjekësore në spitalin e Bulqizës dhe ndodhen jashtë rrezikut për jetën.
25 nxënës po marrin ndihmë mjekësore në spitalin e Peshkopisë, dhe ndodhen jashtë rrezikut për jetën. Një nxënëse me inicialet A. M., 16 vjeçe, është nisur me helikopter drejt Tiranës për ndihmë më të specializuar.
