Vetëm pak ditë na ndajnë nga nisja e vitit shkollor 2017 – 2018 për arsimin parauniversitar dhe është koha kur prindër dhe nxënës, po bëhen gati, po blejnë librat.
Emisioni investigativ BOOM në RTV Ora News ka bërë një vëzhgim në disa shkolla të kryeqytetit, ku është konstatuar se është shkelur urdhri i Ministrisë së Arsimit si për afatet e shpërndarjes së librave ashtu edhe për abuzimin, pasi librat shiten pa pullën e MAS dhe pa kupon tatimor.
Në urdhrin e MAS nr. 274 datë 18 0.05.2017 “Për përzgjedhjen, shpërndarjen dhe shitjen e teksteve shkollore të klasave nga e para në të 12 të sistemit arsimor parauniversitar për vitin shkollor 2017 -2018”, pika 6, thuhet se shitja e librave do të bëhet nga data 25 gusht deri në 10 shtator 2017, pranë shkollave apo pikave të licencuara për shitjen e librave.
Kishte disa librari që kishin marrë përsipër të shisnin dhe librat, që thanë se pjesa më e madhe e shtëpive botuese nuk i kishin furnizuar me asnjë titull. Por jo vetëm në datë 25 por edhe në datë 30, në zonën e Freskut në kryeqytet nuk kishte nisur ende shitja e librave.
Po në udhëzimin e MAS për pjesën e librave, në pikën 6 thuhet : “Tekstet shkollore që shiten duhet të kenë detyrimisht pullën me hologramën e MAS.”
“Subjekteve të licencuara për shitjen e teksteve shkollore nuk u lejohet që bashkë me tekstet shkollore me hologramën e MAS t`u shesin nxënësve tekste që nuk i përkasin katalogut”.
Gazetarët e BOOM kanë konstatuar se libri i edukimit fizik, për klasën e tetë dhe të gjashtë, është shitur pa pullën e MAS për nxënësit e shkollave të ndryshme në Tiranë. Gjithashtu gazetarët verifikuan se ky libër nuk gjendet në katalogun e miratuar nga Ministria e Arsimit për librat shkollorë të këtij viti. Por mes librave të tjerë shitësit abuzues, detyruan nxënësit të blinin edhe atë, pa pullë dhe kundrejt çmimit prej 250 lekësh të reja.
Libri duhet të shitet me kupon tatimor. Pasi përveç evazionit fiskal që shkakton mos tatimi i tij, kuponi tatimor duhet dhe për rimbursimin e kategorive që e përfitojnë falas, si rom, egjiptian, familje me ndihmë ekonomike, etj. Këto kategori duhet të dorëzojnë në shkollë disa dokument bashkë me kuponin tatimor për të marrë mbrapsht lekët e librave. Kamerat e fshehta e BOOM ka qenë në Shkozë, ku shitësi i librave nuk kishte kasë fiskale dhe ju thoshte prindërve që blinin librat se mund të vinin nesër për kuponin.
