10 vite që nga hyrja në fuqi e ligjit antiduhan në ambientet e brendshme, viti 2022 solli një rritje të shkeljeve të këtij ligji në terren. Sipas të dhënave zyrtare nga Inspektorati Shëndetësor Shtetëror, në vitin 2022 kemi rritje me 12 herë të shkeljeve krahasuar me 2021.
Sipas ekspertëve, shkeljet më të mëdha të ligjit antiduhan janë në zonat rurale si dhe qendrat e qyteteve.
Roland Shuperka, ekspert për çështjet e duhanit: Fatkeqësisht ligji antiduhan nuk zbatohet në terren. Më shumë nuk zbatohet në zonat rurale dhe në qendrat e kryeqytetit dhe qyteteve të tjera.
Sipas Shuperkës, shkeljet në ligjin antiduhan më shumë se nga subjektet, vijnë nga vetë qytetarët.
“Nuk zbatohet ligji duke vendosur gjoba. Në ligjin aktual ekziston edhe ajo pika që të dënohet duhanpirësi, në 10 vite nuk ka asnjë të dënuar”.
Në vitin 2019 me ndryshimet në ligjin antiduhan u dyfishuan gjobat për shkelësit. Vetëm në vitin 2022 nga Inspektorati Shëndetësor Shtetëror, vlera totale e gjobave të vendosura arrin në 42 mln Lekë të reja.
