Kur ekipi nuk jep atë që pritet vendimet duhet të jenë të tilla. Presidenti i Olimpiakosit, Evangjelos Marinaqis ka marrë masën ekstreme ndaj lojtarëve të ekipit të tij pasi nuk arritën të plotësonin objektivat e caktuara në fillim të sezonit. Kulmi arriti në momentin që ekipi i tij barazoi me Lavadhiakosin 1-1 në fundjavë, rezultat që e lë Olimpiakosin në vendin e tretë në kampionat.
Për këtë arsye presidenti ka gjobitur me 400.000 euro skuadrën dhe ka urdhëruar lojtarët e tij që të shkojnë me pushime deri në fund të sezonit. Marinaqis zotëron edhe Notingam Forest në Angli. Po ashtu ai ka tregu8ar edhe një dëshpërim për trajnerët që ka shkarkuar, mes tyre dhe Besnik Hasin, pasi vlerëson që ishte faji i lojtarëve dhe jo i trajnerëve që nuk po vinin rezultatet.
“Do ta ndërtoj Olimpiakosin nga e para dhe do ta kthej në skuadrën që kemi ëndërruar. Unë dhe tifozët boll kemi duruar. Do të largoheni sot dhe do të ikni me pushime”, është shprehur Marinaqis, i cili ka deklaruar se shumë pak lojtarë nga ekipi i parë do të qëndrojnë për 3 ndeshjet e fundit të sezonit të rregullt, duke i zëvendësuar me lojtarë nga Olimpiakos U20.
“Skuadra amatore është në themelet e klubit, e dashuron Olimpiakosin dhe tifozët më shumë sesa ju”, ka shtuar Marinaqis, dukshëm i irrituar me lojtarët e ekipit të parë, duke u betuar se paratë e gjobave do t’i investojë tek ekipet e moshave.
“Je e keni mendjen te shtëpitë e bukura ku jetoni dhe te makinat që ngisni, duke mos e vrarë mendjen për ekipin. Unë paguaj miliona që ju të keni gjithçka. Për shkak të veprimeve tuaja pushova nga puna tre trajnerë, por tani e shoh që paksa qenë faji juaj”.
Marinaqis tha se gjysma e gjobës ishte për barazimin ndaj Levadhjakosit dhe pjesa tjetër si ndëshkim për barazimin 1-1 ndaj Panathinaikosit. Olimpiakosi është tashmë 9 pikë pas AEK-ut kryesues, me skuadrën nga Pireu që është dënuar edhe me 3 pikë në renditje, për shkak të dhunës së tifozerisë në humbjen 2-1 ndaj AEK-ut në shkurt.
Me këtë furtunë, nuk është çudi që në ekipin e parë të gjejnë hapësirë disa lojtarë shqiptarë, sepse te Olimpiakosi U-20 aktivizohen portieri 16-vjeçar Livio Malaj, mbrojtësi 17-vjeçar Rezart Rama dhe sulmuesit Emiliano Bullari (16 vjeç) dhe Mario Vrushaj (19 vjeç).
