Shqipëria U-21 e drejtuar nga Alban Bushi do të ketë një risi në grumbullim, i cili ka shumë potencial dhe në të ardhmen pritet të shkëlqejë. Bëhet fjalë për Albion Ademi, i cili zotëron një talent të jashtëzakonshëm dhe tashmë ngelet vetëm puna , që ky lojtar të prek nivelet më të larta të futbollit.
Ademi luan me Inter Turkun në Finlandë, ndërsa prej disa vitesh kishte luajtur për grupmoshat finlandeze. Kur po vinte koha e së vërtetës, futbollisti me origjinë shqiptare bëri zgjedhjen e tij, duke iu bashkuar grupit të lojtarëve që drejtohen nga Bushi.
I ardhur që në tetor, Ademi nuk mund të luante në fushën e lojës, për një problem me dokumentacionin, por tashmë asgjë nuk e ndal dot. Refuzimin që i ka bërë Finlandës, vetë lojtari e ka pohuar edhe në mediat e tyre:
“Shikoni si është puna. Unë kam vendosur përfundimisht që të zgjedh si Kombëtare, Shqipërinë. E dashuroj vendin ku janë rrënjët e mia. Më pëlqen Finlanda si shtet, por Shqipëria ka një vend të veçantë në zemrën time”, u shpreh Ademi për “MTV Sport”.
