Veprimtaria e medias dhe puna e gazetarëve në një shoqëri demokratike është konsdideruar si pushtetit i katërt, por të dhënat e Komitetit për Mbrojtjen e Gazetarëve,tregojnë shifra të frikshme. Shumë gazetarë në botë janë burgosur për shkak të raportimeve në punën e tyre.
“Deri në 1 dhjetor të këtij viti, 262 gazetarë përreth botës janë burgosur për arsye që lidhen me punën e tyre, krahasuar me 259 që ishin vitin e kaluar”-thuhet në raport.
Vendin e parë në botë për burgosjen e gazetarëve e mban Turqia me 73 gazetarë në burg, ndërkohë vendi vazhdon të shtypë çdo ditë lirinë e medias.
“Në vend të dytë dhe të tretë janë Kina me 41 raste dhe Egjipti me 20”, sipas regjistrimeve të CPJ-së. Këto tre vende përbëjnë më shumë se gjysmën e numrit të përgjithshëm të gazetarëve të burgosur në listë.
“Vendet që burgosin gazetarët, për çfarë ata publikojnë, po shkelin ligjet ndërkombëtare dhe duhet të mbahen përgjegjës”- deklaroi Joel Simon, drejtori i përgjithshëm i CPJ-së.
“Fakti që qeveritë represive nuk po paguajnë një kosto që kanë burgosur gazetarët, përbën një dështim për komunitetin ndërkombëtar”- nënvizon raporti.Vendet të tjera që kanë një numër të lartë gazetarësh të burgosur për vitin 2017 janë Eritreja, me 15 raste, Azerbajxhani dhe Vietnami me 10 raste secili.
Ky raport tregon se 74 për qind e gazetarëve janë burgosur me akuzën se janë kundër shtetit, ku në shumicën e rasteve janë përdorur ligjet kundër terrorizmit, në mënyrë të përgjithshme ose të mjegullt. Më të rrezikuarit janë reporterët politikë, që përbëjnë 87 për qind të atyre që janë të burgosur dhe gati të gjithë gazetarët e burgosur në listë janë vendas.
