Deputeti i LZHK-së, Dashamir Shehi, ka shprehur pakënaqësi ndaj mos realizimit deri në fund të misionit të ambasadorit Lu, madje duke e ironizuar se nuk ka kapur as peshk, e as ngjala.
Në një intervistë për “Top Story”, deputeti tha se realiteti është shumë i vështirë. “Deri më sot nuk kemi pasur as peshk, as ngjalë, as gaforre. Asgjë deti. Më vjen shumë keq për ambasadorin, por ky është realiteti”, tha ai.
Ambasadori Lu i shpalli luftë të hapur krimit. Ai kërkonte që lufta kundër krimit të mos shikohej si një betejë kundër PS apo PD, por si betejë për të futur gangsterët në burg.
Lu i mëshonte fort faktit se shqiptarët janë të lodhur nga pritja shumë-vjeçare për drejtësi, dhe se efektet e para janë ndjerë tashmë, pasi ka njerëz të korruptuar që janë trembur. Për të, kishte përfunduar koha e premtimeve boshe, dhe se duhej “përveshur mëngët” për rezultatet konkrete në lidhje me këtë çështje.
