Skënderbeu do të zhvillojë ndeshjen e fundit në Europa League përballë Young Boys, në Bernë. Një ndeshje që vlen për statistikë, pasi të dy ekipet i kanë mbyllur llogaritë dhe nuk shpresojnë për të kaluar fazën e grupeve. Por kjo sfidë do të përpiqet të fitohet nga të dyja skuadrat, për të siguruar disa të ardhura financiare. Për kapitenin e korçarëve kjo sfidë është vlerësuar maksimalisht për të vazhduar ecurinë e mirë që ka ekipi në këto momente. Por një fitore në Zvicër do ta ndihmonte Skënderbeun të kishte një koeficient më të mirë në renditjen e kur të hidhet shorti vitin e ardhshëm.
“Duhet të jetë vazhdë e paraqitjeve të mira, sepse e kemi nisur shumë shpejt dhe ecuria ka qenë mjaft pozitive. Ta mbyllim me sukses edhe këtë ndeshje të fundit. Do të ishim të kënaqur mos të dilnim pa pikë, por fitorja na bën shumë mirë për moral, ta përfundojmë mirë grupin, na shërben për koeficientin për renditjen kur hidhet shorti. Suksesi sjell shumë të mira dhe shpresojmë të dalim me pikë.”
Me ndeshjen e fundit europiane për t’u luajtur, korçarët nuk e heqin vëmendjen nga kampionati. Edhe pse duken pa rivalë në garën për titull, te Skënderbeu nuk i lejojnë vetes asnjë moment shpërqendrimi.
“Sigurisht që pikët dhe diferenca të bëjnë të ndihesh komod. Por nuk mund ta quajmë kurrsesi të përfunduar, pasi kampionati është i gjatë, ende nuk ka kaluar gjysma. Ecuria e mirë vjen si vazhdimësi edhe e Europës. Po ti kapësh në total kemi bërë dy kampionate, me 14 ndeshje në Europa League dhe pothuajse aq në kampionat. Vazhdimësia ka qenë e njëtrajtshme, në kampionat dhe Europë. Kemi bërë mirë, kemi diferencë të konsiderueshme pikësh, por kampionati dhe klasifikimi janë të tilla që me një ndeshje ndryshohen pozicionet.”
James Adeniji
James do të jetë maja e sulmit për ekipin e Ilir Dajës, pasi Ali Soue vuan nga një dëmtim që e la jashtë edhe në ndeshjen përballë Kukësit. Me golat e shënuar në ndeshjet e fundit morali i James është më i artë dhe beson se do të gjejë rrjetën edhe në Europë përballë Youg Boys. Primare për Skënderbeun këtë sezon ka qenë kampionati, ku janë duke e kryesuar mjaft mirë me një diferencë të theksuar nga vendi i dytë.
“Golat e fundit më kanë ndihmuar shumë dhe njëkohësisht janë një qetësi akoma më e madhe për një sulmues. Besoj se erdhën në momentin e duhur, pasi kisha vërtet nevojë të gjeja rrugën e rrjetës. Sigurisht që tani e rëndësishme është që të vijoj me këtë ritëm dhe të mbaj të njëjtën ecuri për shënimin e golave. Kur e them këtë, dua që të përsëritem edhe në ndeshjen e fundit të Europës. Jam i sigurt se kemi mundësinë që të bëjmë një tjetër paraqitje të madhe, edhe pse do të jetë një ndeshje e vështirë.
