Shkarkimi i Sekretarit amerikan të Shtetit, Rex Tillerson, duket se ka ndikuar edhe në marrëdhënien SHBA-Turqi.
Së fundmi, pas këtij vendimi të presidentit Trump, shefi i diplomacisë turke Mevlüt Çavuşoğlu ka anuluar vizitën e planifikuar në Washington. Anulimi vjen për shkak të procesit aktual pas shkarkimit të Sekretarit amerikan të Shtetit, raporton Anadolu Agency (AA).
Çavuşoğlu më 19 mars duhej të kryesonte delegacionin turk në vizitën zyrtare në Washington, ndërsa një burim i paemëruar diplomatik për AA konfirmoi se vizita është anuluar për shkak të vendimit të presidentit amerikan Donald Trump që të shkarkojë Sekretarin e Shtetit, Rex Tillerson.
Trump njoftoi të hënën me anë të një postimi në Twitter shkarkimin e Tillersonit, ndërsa në vend të tij emëroi shefin e deritanishëm të Agjencisë Qendrore të Intelegjencës (CIA) Mike Pompeo.
Nga ana tjetër, dje ministri i Punëve të Jashtme Çavuşoğlu deklaroi se Turqia dëshiron të vazhdojë bashkëpunimin edhe me sekretarin e ri amerikan të Shtetit.
