Ndryshimet klimatike vijojnë të japin ndikimin e tyre mbi sipërfaqen e tokës. Sipas guvernatorit të Kalifornisë, Xheri Braun, zjarret që kanë pushtuar shtetin gjatë ditëve të fundit, mund të ndodhin në çdo vit për shkak të ndryshimeve klimatike.
Për një javë Kalifornia e jugut ka luftuar për shuarjen e flakëve, të cilat janë regjistruara në gjashtë vatra madhore duke djegur dhjetëra hektarë tokë dhe kanë lënë pas dëme të konsiderueshme.
“Po përballemi me një realitet të ri në këtë shtet, ku zjarret kërcënojnë jetët e njerëzve, pronat e tyre dhe sigurisht miliarda dollarë,”-ka thënë guvernatori i Kalifornisë.Mijëra zjarrfikës janë angazhuar për të bërë të mundur shuarjen e flakëve, që prej ditës së hënë. Dita e shtunë ka qenë një ditë në të cilën zjarrfikësit kanë ecur me punën e tyre, kjo e ndihmuar edhe nga përhapja e flakëve më ngadalë, pasi nuk frynte erë.
Autoritetet lokale kanë lëshuar alarmin për gjendjen, ndërsa Presidenti i Shteteve të Bashkuara të Amerikës, ka shpallur gjendjen e emergjencës për Kaliforninë, kjo për t’i hapur rrugë përmirësimit të situatës në këtë rajon jugor.
