Tre aeroplanmbajtëse amerikane treguan forcën në Paqësorin Perëndimor gjatë fundjavës. Kjo është hera e parë në një dekadë që kolosët prej 100 000 tonësh secili lundrojnë bashkë.
Këto aeroplanmbajtëse, konkretisht Ronald Reagan, Theodore Roosevelt dhe Nimitz, po marrin pjesë në një stërvitje ushtarake dhe do të zgjasin deri të martën.
Komandanti i Flotës Amerikane, Scott Swift tha:
“Operacionet e shumëfishta të forcave ushtarake janë shumë komplekse dhe kjo stërvitje në Paqësorin Perëndimor është një dëshmi e fortë e aftësive unike të Flotës së SHBA-ve, që tregon përkushtimin e hekurt për sigurinë dhe stabilitetin e vazhdueshëm të rajonit”.
Një zyrtar i Ministrisë së Mbrojtjes të Koresë së Jugut tha se tre aeroplanmbajtësit amerikanë mbajtën stërvitje në të dy anët e ujërave që ndanin Gadishullin Korean dhe Japoninë. Ushtrimet më të afërta me bregun e Koresë përfshinin anijet e SHBA dhe të Koresë së Jugut, ndërsa ato më të afërta me Japoninë përfshinin anije amerikane dhe japoneze, raporton CNN.
“Ne dërguam atje tre prej aeroplanmbajtësve më të mëdhenj në botë (në gadishullin Korean) dhe po pozicionohet një tjetër nëndetëse bërthamore”, tha presidenti i SHBA, Donald Trump pas mbërritjes së tij në Korenë e Jugut javën e shkuar.
“Shpresojmë që të mos na duhet t’i përdorim kurrë”, shtoi Trump me ton kërcënues, duke paralajmëruar për një ndërhyrje të mundshme.
Tre aeroplanmbajtëset masive përbëjnë një të tretën e këtyre armëve në arsenalin amerikan, ndërkohë që vende si Kina dhe Rusia kanë nga një apo dy të tilla.
Dërgimi i tre aeroplanmbajtëseve në të njëjtin vend është një sinjal i qartë paralajmërimi ndaj Koresë së Veriut.
Ndërkohë, duket se Trump ka ndërmend të bëjë paqe me Kim Jong-un, teksa tha një ditë më parë se takimi me të do të ishte në të mirë të botës./ Tirana Today
