Manchester United do të vazhdojë fazën përgatitore ne SHBA, në prag të sezonit të ri. Por ata do të duhet të vazhdojnë stërvitjen pa yllin kilien Alexis Sanchez, pasi nuk i është dhënë viza nga autoritetet amerikane.
Besohet se gjithçka është e lidhur me problemet që Sanchez ka me autoritetet spanjolle, që nga koha kur ishte pjesë e Barcelonës. Sulmuesi në muajin shkurt pranoi dënimin me 16 muaj burg për evazionin fiskal dhe dënimin nuk do ta kryej pasi nuk ka precedentë penal.
Sipas ligjeve në SHBA, një person që është deklaruar fajtor për mashtrim nuk e gëzon të drejtën për t’u pajisur me vizë për të hyrë në vend. Megjithatë, përfaqësuesit ligjorë të Sanchez po punojnë që të mundësohet udhëtimi i kilianit për në SHBA, në mënyrë që të bashkohet me pjesën tjetër të Manchester United dhe nuk dihet nëse ai do të arrijë në kohë në SHBA për të zhvilluar ndeshjen e parë miqësore që “Djajtë e Kuq” e kanë me Club America.
