Të gjithë trupat e ushtrisë amerikane të vendosura në Japoni, e kanë të ndaluar që të konsumojnë alkool. Ky rregull vjen pas një përplasjeje vdekjeprurëse në ishullin e Okinavës, të lidhur me drejtimin e mjetet në gjendje të dehur.
Gjithashtu ushtria amerikane u ka bërë thirrje trupave të saj në Okinava që të qëndrojnë në bazë ose në rezidencat e tyre. Gjatë ditë së diel, një ushtar amerikan përplasi kamionçinën e tij mbi një minifurgon, duke i marrë jetën shoferit të mjetit tjetër.
BBC shkruan se Okinava ka mirëpritur gjysmën e trupave amerikanë në Japoni, por banorët lokalë kanë kohë që ankohen nga prania e rëndë ushtarake.
Nëpërmjet një deklarate, ushtria amerikane ka konfirmuar se një nga pjesëtarët e saj ishte përfshirë në aksident, duke shtuar se alkooli mund të ketë qenë një faktor.
Ushtria po ashtu ka lajmëruar se “do të nisë trajnime të detyrueshme për të adresuar përdorimin e alkoolit, rreziqet dhe sjelljen e pranueshme për të gjithë trupat e saj në Japoni”.
Ndërkohë policia japoneze është shprehur se ushtari që ka shkaktuar aksidentin kishte tre herë më shumë alkool në gjak sesa limiti, raporton “Reuters”. Gjithashtu thuhet se ai tashmë ndodhet në burg për “neglizhencë të përdorimit të makinës, duke shkaktuar vdekjen e një personi”.
Ndërkohë prania amerikane në Okinava, në jug të Japonisë, pranë brigjeve të Kinës, është pjesë kyçe e aleancës amerikano-japoneze të sigurisë. Baza mban rreth 26 mijë trupa amerikane.
Ka plane për të zhvendosur një pjesë të saj në një zonë më pak të populluar të ishullit, por shumë banorë vendas duan që baza të largohet tërësisht.
Në vitin 2016, dhjetëra e mijëra njerëz dolën në protesta kundër trupave amerikane. Zemërimi ndaj pranisë amerikane është rritur mes banorëve lokalë, veçanërisht që nga përdhunimi në grup i një 12-vjeçareje, ngjarje për të cilën fajësohen trupat amerikane, në vitin 1995.
Edhe në vitin 2016, vrasja e një gruaje u lidh me një ish-marins, gjë që po ashtu çoi në ndalimin e përkohshëm të alkoolit, si edhe një ndalimqarkullimi gjatë natës. /TIRANA TODAY/
