Një ditë më parë, Gjykata e Durrësit vendosi masën “Arrest në burg” për shtatë adoleshentët nga Kavaja, të cilët akuzohen se kanë kryer marrëdhënie seksuale me një vajzë 13-vjeçare, nëpërmjet shantazhit me një video intime.
Por pesë prej tyre kanë mohuar të kenë kryer marrëdhënie me të miturën, ndërsa dy të tjerët kanë pranuar akuzat përpara gjyqtares që kishte dosjen në dorë.
Dy të miturit që pranuan akuzën, kanë pohuar se nuk e kishin shantazhuar vajzën, por ajo kishte shkuar me dëshirën e saj. Avokati Gramoz Lika, që ka në mbrojtje katër prej të miturve, kërkoi masë më të lehtë.
Sipas tij, akuza ende nuk është provuar, por edhe për shkak të moshës. Kërkesa në fjalë u refuzua nga gjyqtarja e seancës, Nurjeta Tafa, e cila pranoi kërkesën e prokurores Oltiana Çifligu, dhe la në burg shtatë të rinjtë. Një 15- vjeçar, i dashuri i vajzës është ende në kërkim si i akuzuari i tetë për abuzimin me të miturën.
